Чиглэл ХХК

Хоёр айлын газар худалдан авч, гурван давхар агуулах бариулж байна Монголчууд бид хоол хүнс боловсруулан, хадгалах тогоо, сав суулгаа тэр чигт нь шахуу урд хөршөөсөө авдаг. Тэгвэл тэдгээр бүтээгдэхүүнүүд эрүүл ахуйн шаардлагад хэр нийцсэн байдаг бол? Саяхан Мэргэжлийн хяналтын ерөнхий газрын хийсэн судалгаагаар айраг, цагаан идээ, зөөврийн усаа агуулдаг хуванцар савнуудын 96 хувь нь хүнсний зориулалтын бус байдаг нь тогтоогджээ. Тогооны тухайд айл бүрт “халуун тогоо” гэгч цахилгаан их зарцуулдаг, чанаргүй эд бийг хэн хүн андах билээ. Тэгвэл эрүүл ахуйн шаардлагад нийцсэн нийтийн хоолны тогоо, тоног төхөөрөмж үйлдвэрлэдэг үндэсний үйлдвэрлэгч “Чиглэл” компанийн бүтээгдэхүүнүүдийн талаар Аж үйлдвэрийн яамнаас мэдээлэл аваад, үйлдвэрийн байраас нь сурвалжлага бэлдлээ. Компанийн захирал Ц.Бумцэнд: “Тогоо судлаач гэдэг мэргэжил байсан бол би тийм мэргэжилтэн гэж өөрийгөө танилцуулах сан. Нээрээ л би тогоо судлаач” гэв. Учир нь тэрбээр 1989 онд “Чиглэл” хоршоогоо байгуулан, гэр ахуйн цахилгаан хэрэгсэл, нийтийн хоолны тоног төхөөрөмжийн засвар эрхэлж, мөн үеэс орон орны тогоог судалж, Монгол оронд тохиромжтойг нь бүтээхийн төлөө ажиллаж эхэлжээ. Арав гаруй жилийн туршилт, судалгаа, хөдөлмөрийнхөө дүнд “Намуунзаяа” тогоогоо нийтийн хоолны салбарт нийлүүлсэн нь хэрэглэгчдээс талархал хүртээд зогсохгүй, тус компанийн брэнд бүтээгдэхүүн болж, удахгүй ОХУ-д нийлүүлэхээр ажиллаж байгаа юм байна. Гэнэтийн ослоор алдсан охиныхоо нэрээр нэрлэсэн тус тогооны гадна, дотор талыг зэвэрдэггүй гангаар хийсэн, цэвэр устай шууд холбох боломжтой учир хүний хөдөлмөрийг хөнгөвчилсөн, хамгийн гол нь эрүүл ахуйн шаардлагад нийцсэн, цахилгаан зарцуулалт багатай бүтээл болсон байна. Бэлэн болсон "Намуунзаяа" тогоо Сургууль, цэцэрлэг, эмнэлэг, дотуур байрны гал тогоонд шөлтэй хоол хийх, аарц буцалгах, сүү хөөрүүлэх, ариутгах, тараг бүрэх, цай чанах зэрэг 10 гаруй ажлыг нэг тогоонд хийдэг олон үйлдэл нь “Намуунзаяа” тогооны онцлог аж. Тиймээс ч шинээр ашиглалтад орж буй сургууль, цэцэрлэгийн гал тогоонд нийлүүлэхээр хэд хэдэн удаа тендерт өрсөлдсөн ч танилын сүлжээ, тендерийн луйврын балгаар өчүүхэн шалтгаан тоочин хасдаг хэмээн үйлдвэрийн захирал хэллээ. Мөн тэрбээр “Манайд эмнэлэг тэр бүр ашиглалтад ороод байх биш. Сургууль, цэцэрлэгүүдийн гал тогоонд дан Хятад барилгын ажилчдын хоол хийдэг тогоог сонгож байгаа нь үнэхээр харамсалтай. Хятадад цэцэрлэгийн хоолны тогоо гээд шал өөр тогоо байдаг юм байна лээ. Харин барилгын ажилчдад зориулан бүтээсэн эрүүл ахуйн ямар ч шаардлага хангахгүй, хамгийн хямд тогоог манайхан тендерээс мөнгө гаргахын тулд сонгож, нялх үрсээ хооллож байна. Боловсролын яамны Төрийн нарийн бичгийн дарга н.Булган-Эрдэнэ гэгч нөхөр иймэрхүү тендерийн ажлаар мэргэшчихсэн юм байна лээ. Хоёр сая 800 мянгын тогооны тендерт Хятад барилгачдын хэрэглэдэг 600 мянгын тогоог шахаад л сууж байдаг” гэв. Тиймээс ч төрийн байгууллагуудад бүтээгдэхүүнээ нийлүүлэх ямар ч боломж гардаггүй тул хэрэглэгчид нь хувийн хэвшлийнхэн байдаг аж. Цахилгаан, газан хосолсон плитка Цэвэр усны ган сав 50 гаруй ажилчинтай тус үйлдвэр ган төмрийг хайчилж, нугалах, ховил, хэв гаргах зориулалттай 10 гаруй машинаараа нэгдүгээр хоолны тогоо, цэвэр усны сав, хоол халуун байлгагч, цахилгаан пийшин, газын зуух, жигнүүр бэлтгэлийн ширээ, ууц, ул боов, хуушуурын тогоо зэргийг үйлдвэрлэдэг байна. Хоёр жилийн өмнө Засгийн газрын 888 төсөлд хамрагдаж, зээл авсан бөгөөд агуулах, үйлдвэрийн байр, үйлдвэрийн дэргэдэх дэлгүүрээ барьж эхэлжээ. Ул боов чанах тогоо Дотоодын зах зээлийн 15-20 хувийг хангах болсон тус үйлдвэр цаашид бүтээгдэхүүнийхээ тоо, загварыг нэмэгдүүлэх, ОХУ-д нийлүүлэх зорилготой ажиллаж байгаа юм байна.

Мэдээний эх сурвалж: http://time.mn:81/64067

739 удаа үзсэн